Taliyaha Ciidanka Dhulka ee Xoogga Dalka Soomaaliyeed, Sareeye Guuto Sahal Cabdullaahi Cumar, ayaa gaaray deegaano ka tirsan gobolka Shabeellaha Hoose oo dhawaan laga saaray maleeshiyaadka Al-shabaab, kadib howlgallo guulo laga gaaray.
Ujeeddada safarka Taliyaha ayaa ahayd dhiirrigelinta iyo bogaadinta geesiyada Ciidamada XDS iyo kuwa deegaanka ee ku sugan furimaha dagaalka, kuwaas oo door muuqda ka qaatay xoreynta deegaanadaasi.
Intii uu ku sugnaa goobaha laga saarayay, Sareeye Guuto Sahal Cabdullaahi Cumar ayaa kulamo la qaatay saraakiisha hoggaaminaysa howlgalada, isaga oo ka xaal wareystay xaaladda guud ee amniga, isla markaana dhageystay warbixino la xiriira howlgallada socda, baahiyaha jira iyo qorshayaasha lagu xaqiijinayo amniga deegaanadaasi.
Taliyaha Ciidanka Dhulka ayaa si gaar ah u bogaadiyay geesinimada, adkaysiga iyo naf-hurnimada ay muujiyeen ciidamada isgarabsanaya, isaga oo xusay in guulaha la gaaray ay caddeyn u yihiin wada-shaqeyn miro dhal ah iyo go’aan adag oo lagu ciribtirayo Khawaarijta.
Sareeye Guuto Sahal Cabdullaahi Cumar ayaa sidoo kale ciidamada ku boorriyay inay sii laba-jibaaraan dadaalkooda, isla markaana ay feejignaan dheeraad ah muujiyaan si loo xaqiijiyo amniga iyo xasilloonida deegaanada laga xoreeyay, loogana hortago isku-day kasta oo cadowgu dib ugu soo laaban karo.
Howlgallada ka dhanka ah Khawaarijta ee ka socda gobolka Shabeellaha Hoose ayaa weli sii socda, iyada oo dowladda Soomaaliya ay adkeynayso dadaallada lagu xaqiijinayo nabad waarta iyo in adeegyada dowliga ah dib loogu celiyo deegaanada la xoreeyay.
