Madaxweynaha Mareykanka, Donald Trump, ayaa markii ugu horreysay si toos ah su’aal looga weydiiyay wararka sheegaya in Somaliland ay daneynayso in lagu raro dadka reer Qaza, haddii la aqoonsado madax-bannaanideeda.
Trump ayaa sheegay in arrintaas ay weli miiska saaran tahay oo ay u baahan tahay xal siyaasadeed iyo diblomaasiyadeed oo adag, isagoo yiri: “Waanu eegaynaa hadda arrintaas. Waa su’aal wanaagsan, dhab ahaantii, laakiin hadda waan ka shaqeyneynaa hawshaas.”
Madaxweynaha ayaa ka meermeeray in uu bixiyo jawaab cad oo ku saabsan mowqifka rasmiga ah ee Mareykanka, balse wuxuu muujiyay in Somaliland ay weli ku jirto “xisaabinta istiraatijiyadeed” ee Washington, inkastoo aan la filayn in go’aan rasmi ah laga gaaro waqti dhow.
Wararka ku saabsan qorshahan ayaa markii ugu horreysay soo shaac baxay bishii hore, kadib markii ilo diblomaasiyadeed ay sheegeen in la isku dayayo in Somaliland lagu daro qorshaha caalamiga ah ee xalinta dhibaatada bani’aadantinimo ee Qaza, taas oo dhalisay dood xooggan iyo falcelin ballaaran gudaha Soomaaliya iyo gobolka.
Illaa iyo hadda, ma jiro wax caddeyn rasmi ah oo muujinaya in wadaxaajoodyo toos ah oo arrintan ku saabsan ay u socdaan dhinacyada Somaliland iyo Mareykanka, balse hadalka Trump ayaa u muuqda mid albaabka ka tagaya furan.
