Madaxweynaha Soomaaliya,Xasan Sheekh Maxamuud, ayaa maanta kulan ku yeeshay Madaxtooyada Qaranka isaga oo la shiray Golaha Samatabixinta Soomaaliyeed, kaas oo ay ku mideysan yihiin Madaxweynayaashii hore ee dalka.
Kulanka waxaa hoggaaminayay Madaxweynihii hore, Mudane Shariif Sheekh Axmed, waxaana sidoo kale goobjoog ahaa guddiga uu Madaxweynaha u xil-saaray gogosha wadatashiga.
Kulankan Labada dhinac waxay si qoto dheer uga doodeen afar ajande oo saldhig u ah mustaqbalka siyaasadeed iyo amni ee dalka:
1. Adkeynta midnimada iyo wadajirka dalka
2. Hagaajinta hannaanka dib-u-eegista Dastuurka
3. Dardargelinta dagaalka lagula jiro argagixisada
4. Dhameystirka hannaanka doorashooyin xor iyo xalaal ah oo heshiis lagu yahay
Sidoo kale, labada dhinac waxay isla qaateen muhiimadda ay leedahay in la dardargeliyo raadinta mas’uuliyiinta wali ka maqan gogosha, si loo helo midnimo buuxda iyo wadajir qaran.
Intaas kadib, waxaa la isku raacay in wadahadallada la sii ambaqaado, iyada oo dib loogu balansan yahay in kulamada wadatashiga ay dib u bilaabmaan 3-da bisha Luuliyo 2025, xilli uu si rasmi ah u bilaabanayo usbuuca xorriyadda.
