Xildhibaano ka tirsan Golaha Samata-bixinta Qaranka Soomaaliyeed ayaa war-saxaafadeed ay soo saareen ku cambaareeyay kalfadhiga 7-aad ee Baarlamaanka Federaalka, iyagoo ku tilmaamay mid aan sharciyad iyo dastuur waafaqsanayn.
Xildhibaanada ayaa ku eedeeyay Madaxweynaha Soomaaliya Xasan Sheekh Maxamuud iyo Guddoomiyaha Baarlamaanka Sheekh Aadan Madoobe in ay ku guuldarreysteen ilaalinta dastuurka iyo shuruucda dalka, ayna horseedeen khilaaf siyaasadeed, musuq-maasuq, iyo kala qaybin bulsho.
Sida lagu xusay war-saxaafadeedka, Golaha Samata-bixinta wuxuu bulshada Soomaaliyeed, siyaasiyiinta, iyo beesha caalamka ugu baaqay in aysan aqoonsan natiijooyinka ka dhasha kalfadhiga 7-aad, islamarkaana ay cadaadis ku saaraan hoggaanka dowladda iyo baarlamaanka si loo ilaaliyo dastuurka iyo nidaamka dowladnimo ee dalka.
Golaha ayaa sidoo kale sheegay in fashilka kalfadhiga 7-aad uu caddeyn u yahay in Baarlamaanka Soomaaliyeed uusan ka shaqeyneyn danaha shacabka, ayna lama huraan tahay in la qaado tallaabooyin lagu badbaadinayo sharciga iyo dimoqraadiyadda dalka.
