Wargeyska The New York Times ayaa daabacay warbixin muujinaysa xiisad cusub oo ka taagan xeebaha Yemen, kadib markii ay adkaatay in dib loo soo celiyo markab shidaal oo lagu magacaabo “MT Eureka” oo laga afduubtay gobolka Shabwah.
Markabkan oo ay saarnaayeen 12 badmaax oo u kala dhashay Masar iyo Hindiya ayaa la sheegay in ay afduubteen burcad-badeed Soomaali ah oo hubeysan, sida uu wargeysku ka soo xigtay sarkaal ka tirsan maamulka Puntland. Waxaa sidoo kale jira tuhunno muujinaya in dad Yemeniyiin ah ay ku lug lahaayeen hawlgalkan.
Warbixinta ayaa tilmaameysa in baaritaanno socda ay diiradda saarayaan suurtagalnimada xiriir ka dhexeeya afduubayaasha iyo kooxo hubeysan oo ka hawlgala gobolka, oo ay ku jirto kooxda Xuutiyiinta Yemen.
Dhanka kale, Hay’adda Ilaalada Xeebaha Yemen ayaa sheegtay in dadaalladii lagu doonayay in markabka lagu soo furto ay la kulmeen caqabado waaweyn, sababo la xiriira awood xaddidan oo dhinaca badda ah. Markabka oo siday ku dhowaad 2,800 tan oo naafto ah ayaa la sheegay inuu u jiheystay xeebaha waqooyi-bari ee Soomaaliya, isagoo ku jira gacanta sagaal nin oo hubeysan oo la sheegay inay Soomaali yihiin, kuwaas oo watay hub culus oo ay ku jiraan RPG.
Hay’addu waxay sidoo kale sheegtay in inkasta oo uu jiro iskaashi caalami ah, haddana doorkoodu uu ku koobnaa kaliya dabagalka iyo ogaanshaha halka uu markabku marayo, iyada oo aan la sameyn faragelin toos ah.
Dhacdadan ayaa sare u qaadaysa walaaca laga qabo amniga marinnada badda iyo suurtagalnimada iskaashi u dhexeeya burcad-badeedda iyo kooxaha hubeysan ee gobolka.
