Madaxweynaha Dawladda Waqooyi Bari Soomaaliya Cabdiqaadir Axmed Aw Cali oo uu weheliyo Madaxweyne Ku-xigeen Cabdirashiid Yuusuf Jibriil ayaa maanta horgeeyey Golaha Baarlamaanka DWS xubnaha cusub ee Golaha Wasiirada iyo Qorshaha xukuummadda ee 5-ta Sano.
Madaxweynaha oo khudbad ka jeediyey Golaha ayaa Xildhibaanada sharafta badan ka codsaday inay codka kalsoonida siiyaan Xukuumada cusub, isagoo sidoo kale Golaha Baarlamaanka la wadaagay Barnaamijka uu ku hoggaaminaya Xukuumada oo ka kooban Lix tiir ee oo kala ah:-
1. Amniga iyo Cadaaladda
2. Daadejinta Dawladda iyo Dimuqraadiyeynta
3. Horumarinta dhaqaalaha
4. Horumarinta adeegyada bulshada
5. Xaqiijinta Maamul wanaaga iyo cidhib-tirka Musuqa
6. Tayaynta Garsoorka iyo xaqiijinya sarreynta sharciga
Intaa kaddib, Golaha Baarlamaanka ayaa Xubnaha Golaha Wasiirada mid mid uga dhegaystay sooyaalkooda nololeed iyaga oo ku ansixiyey cod aqlabiyad ah, sidaasna waxaa ku ansaxay Golaha Xukuumada iyo Barnaamijka 5-ta Sano.
Ugu dambayn Madaxweynaha ayaa Shir-guddoonka iyo Xildhibaanada Golaha uga mahadceliyey ansixinta Xukuumada iyo Qorshaha 5-ta Sano, isaga oo ku boogaadiyey shaqada wanaagsan ee Goluhu hayo, xusayna muhiimada ay leedahay adkaynta wadashaqaynta Goleyaasha Dawladda.
