Telefishinnada Al-Jazeera iyo Al-Carabiya ayaa weriyay in Isbahaysiga Sacuudiga hoggaamiyo ee Yemen uu sheegay in hoggaamiyaha Golaha Ku-meelgaarka Koonfureed (STC), Caydaruus Al-Zubaidi, uu u baxsaday Imaaraadka Carabta isaga oo sii maray Somaliland.
Isbahaysiga ayaa sheegay in Al-Zubaidi uu habeen madow kaga baxay magaalada Cadan, isagoo markab ku gaaray dekedda Berbera ee Somaliland.
Warbixintu waxay intaas ku dartay in Al-Zubaidi uu Berbera ka raacay diyaarad nooca xamuulka iyo ciidanka qaadda ah oo lagu magacaabo Ilyushin.
Safarka diyaaradda ayaa si dhow u kormeerayay saraakiil ka socday Dowladda Imaaraadka Carabta, sida uu sheegay Isbahaysiga Sacuudiga.
Diyaaradda ayaa la sheegay inay sii martay magaalada Muqdisho, ka hor inta aysan u gudbin Abu Dhabi.
Isbahaysiga ayaa sheegay in diyaaradda ay dansatay qalabkeedii aqoonsiga marka ay dul mareysay Gacanka Cumaan, kadibna ay dib u shidday wax yar ka hor inta aysan degin.
Ugu dambeyn, diyaaradda ayaa ka degtay Gegida Diyaaradaha Milatariga ee Al-Reef ee magaalada Abu Dhabi.
Ilaa iyo hadda, Golaha STC iyo Dowladda Imaaraadka Carabta kama aysan hadlin warkan, iyadoo la tilmaamay in arrintan ay sii hurin karto khilaafka u dhexeeya Sacuudiga iyo Imaaraadka.
