Wasiiru-dowlaha Arrimaha Dibadda Soomaaliya, Cali Cumar Balcad, ayaa sheegay in Dowladda Isutagga Imaaraadka Carabta (UAE) ay si khaldan u isticmaashay hawada Soomaaliya, isla markaana ay soo marsiisay hoggaamiyaha Koonfurta Yemen, Caydaruus Al-Subeydi, iyada oo aan wax wargelin ah la siin hay’adaha rasmiga ah ee dowladda Soomaaliya.
Cali Balcad oo wareysi siiyay AlJazeera ayaa sheegay in tallaabadan aysan ku jirin heshiisyadii hore ee u dhexeeyay Soomaaliya iyo UAE, isla markaana ay dowladda u aragtay xadgudub cad oo ka dhan ah madax-bannaanida qaranka. Wuxuu intaas ku daray in arrintan ay door ku lahayd dedejinta go’aannadii ay dowladda Soomaaliya ka qaadatay Imaaraadka.
Sida uu Wasiirku tilmaamay, diyaaradda waday Caydaruus Al-Subeydi ayaa ku degatay Terminalka 23 ee garoonka Muqdisho, kaas oo ay wada isticmaalaan diyaaradaha Mareykanka, Boqortooyada Midowday (UK), Turkiga iyo Imaaraadka. Waxa uu xusay in horay Madaxweynaha Soomaaliya, Xasan Sheekh Maxamuud, uu amar ku bixiyay in aan la baari karin diyaaradaha isticmaala terminalkaas, taas oo sare u qaadday walaaca dhanka amniga iyo habraacyada dowladda.
Dhanka kale, Wasiir Cali Balcad ayaa tilmaamay in maalmo ka hor ay jireen dadaallo ay sameeyeen taageerayaal dowladda ka tirsan oo lagu doonayay in lagu yareeyo ama lagu beeniyo arrintan, balse uu sheegay in dadaalladaasi aysan miro dhalin, kaddib markii xaqiiqooyin dheeraad ah soo baxeen.
Arrintan ayaa kusoo aadaysa xilli xiriirka u dhexeeya Soomaaliya iyo Imaaraadka Carabta uu marayo marxalad xasaasi ah, iyadoo dowladda Soomaaliya ay horay u qaaday tallaabooyin ay ku muujinayso ilaalinta madax-bannaanideeda iyo xakamaynta hawadeeda.
