Kooxda Dawladda Islaamiga ah (IS) ayaa sheegtay inay ka dambaysay qarax ismiidaamin ah oo Jimcihii ka dhacay masaajid Shiico ah oo ku yaalla caasimadda Pakistan ee Islamabad, kaas oo ay ku dhinteen in ka badan Soddon qof.
Warka kooxdu soo saartay ayaa lagu sheegay magaca iyo sawirka qofka lagu eedeeyay weerarka. In ka badan boqol iyo toddobaatan qof ayaa ku dhaawacmay qaraxa, kaas oo noqday kii ugu dhimashada badnaa ee ka dhaca Islamabad muddo ka badan toban sano.
Wasaaradda Arrimaha Gudaha ee Pakistan ayaa sheegtay in qofka weerarka soo qaaday marar badan u safri jiray dalka Afgaanistaan. Dawladda Taalibaan ee Afgaanistaan iyo sidoo kale dalka Hindiya ayaa labaduba cambaareeyay qaraxa.
