Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa khadka taleefoonka kula hadlay Amiirka Dowladda Qatar, Sheekh Tamiim bin Hamad Al Thani, iyagoo ka wada hadlay xaaladda gobolka iyo xiriirka labada dal.
Intii uu socday wicitaanka, Madaxweynaha Soomaaliya ayaa wax ka weydiiyay xaaladda Qatar kadib weerarradii ay Iran qaaday, isaga oo muujiyay garab istaagga buuxa iyo taageerada ay Soomaaliya la garab taagan tahay dowladda iyo shacabka Qatar.
Dhankiisa, Amiirka Qatar ayaa uga mahadceliyay Madaxweynaha Soomaaliya dareenka iyo garab istaagga uu muujiyay, isagoo tilmaamay xiriirka walaaltinimo iyo iskaashiga qotada dheer ee mideeya labada dal.
Labada dhinac ayaa sidoo kale carrabka ku adkeeyay muhiimadda ay leedahay in mudnaanta la siiyo wada-hadalka iyo xalalka diblomaasiyadeed si loo xalliyo xiisadda taagan, loogana hortago in xaaladdu sii kacsato.
