Imaaraadka Carabta ayaa amar ku bixisay in la xiro 10 qof oo lagu eedeeyay inay faafiyeen muuqaallo muujinaya nidaamyada difaaca cirka ee dalka oo ka hortagaya weerarro cirka ah, iyo sidoo kale muuqaallo been abuur ah oo muujinaya qaraxyo iyo duqeymo, sida ay sheegtay warbaahinta dowladda Imaaraadka.
Sida ay warbaahinta dowladdu sheegtay, dadkaas ayaa daabacay muuqaallo dhab ah oo la xiriira weerarrada, iyo sidoo kale muuqaallo iyo sawirro kale oo lagu sameeyay Garaadka macmalka ah (AI) oo lagu baahiyay bogag iyo baraha internetka ee gudaha Imaaraadka. Waxaa sidoo kale lagu sheegay in loo gudbiyay “maxkamad degdeg ah”.
Dhanka kale, booliska Abu Dhabi ayaa sheegay inay xireen 45 qof oo “jinsiyado kala duwan leh” kadib markii lagu eedeeyay inay duubeen muuqaallo islamarkaana “faafiyeen macluumaad khaldan” intii lagu jiray weerarrada lagu qaaday dalka.
Arrintan ayaa timid kadib markii toddobaadkii hore nin 60 jir ah oo u dhashay Ingiriiska lagu soo oogay dacwad ku saleysan sharciyada dambiyada internetka ee Dubai, kadib markii lagu eedeeyay inuu duubay gantaallo Iiraani ah oo dul maraya magaalada.
Radha Stirling, oo ah madaxa fulinta ee ururka Detained in Dubai, ayaa sheegtay in 21 qof lagu soo oogay dacwado ku saleysan sharciyada dambiyada internetka ee Imaaraadka, kuwaas oo la xiriira “muuqaallo iyo qoraallo baraha bulshada lagu daabacay oo ku saabsan weerarradii gantaallada ee dhowaan dhacay”.
Sawirro muujinaya jajabyo ka dhashay gantaallo oo ku dhacay dhisme dhaadheer oo la deggan yahay, hoteel qaali ah iyo garoonka diyaaradaha ee Dubai ayaa si weyn ugu faafay internetka.
