War qoraal ah oo ka soo baxay Hay’adda Nabad Sugidda iyo Sirdoonka Qaranka (NISA) ayaa lagu sheegay in howlgal qorsheysan oo laga fuliyay gobollada Hiiraan iyo Mudug lagu dilay horjoogayaal iyo maleeshiyaad ka tirsan Al‑Shabaab.
Qoraalka ayaa lagu sheegay in ciidanka NISA oo kaashanaya saaxiibada caalamiga ah ay beegsadeen xubno ka tirsan maleeshiyaadka Al-Shabaab oo ku howlanaa abaabulka falal lid ku ah amniga shacabka Soomaaliyeed, waxaana howlgalka lagu dilay in ka badan 22 xubnood.
Howlgalka koowaad ayaa ka dhacay deegaanka Dumaaye ee gobolka Mudug, halkaas oo lagu bartilmaameedsaday goob ay isku uruursanayeen maleeshiyaad iyo horjoogeyaal ka tirsan Al-Shabaab. Weerarkaasi waxaa lagu dilay ilaa 15 xubnood oo ay ku jireen horjoogayaal kala ah Xudeyfa Galinle, Qataatow, Cabdiraxmaan Garwayne, Daahir iyo Cabdiwali.
Sidoo kale howlgal kale oo ka dhacay degmada Maxaas ee gobolka Hiiraan ayaa lagu beegsaday labo guri oo ay ku sugnaayeen horjoogeyaal iyo maleeshiyaad ilaalo u ahaa Mustaf Caato oo lagu tilmaamay horjoogaha maleeshiyaadka ee gobolka Hiiraan. Howlgalkan ayaa lagu dilay toddobo xubnood oo ay ku jireen laba horjooge oo muhiim u ahaa maaliyadda kooxda, kuwaas oo kala ahaa Qaliif Muumin Sabriya iyo Cismaan Cabdulle Faarax, waxaana sidoo kale lagu burburiyay gaadiid ay isticmaalayeen.
Hay’adda NISA ayaa sheegtay in ay sii dardargelin doonto howlgallada ka dhanka ah maleeshiyaadka Al-Shabaab si looga sifeeyo goobaha ay ku dhuumaaleysanayaan.
