Maxkamadda Ciidamada qalabka sida ayaa fulisay xukunka dilka toogashada ahaa ee lagu riday Dable ka tirsanaa Hay’adda Nabad Sugidda iyo Sirdoonka Qaranka Mukhtaar Shakuur Amiin, kadib markii lagu helay dilka Marxuum Fatxi Cabdullaahi Cabdi.
Dilkan ayaa ka dhacay degmada Afgooye ee gobolka Shabeellaha Hoose 16-kii February 2026, waxaana la sheegay inuu ka dhashay muran la xiriiray taleefanka marxuumka oo laga dhacay xilli uu ka soo baxay masjid uu ku tukaday salaadda Duhur.
Kiiska oo ay baaritaan ku sameeyeen Xafiiska Xeer-ilaalinta Ciidamada, ayaa ugu dambeyn maxkamaddu ku xukuntay Mukhtaar Shakuur Amiin dil toogasho ah, si qisaas loogu fuliyo Marxuumka, sida uu warbaahinta u sheegay Guddoomiyaha Maxkamadda Darajada Koowaad ee Ciidamada, Xasan Cali Nuur Shuute.
