Maamulka Koofur Galbeed ayaa shaacisay in cutubyo ka tirsan ciidamada sida gaarka ah u tababaran ee Danab iyo Gorgor la geeyey qeybo kamid ah gobolka Baay, gaar ahaan deegaano ku dhow magaalada Baydhabo.
Guddoomiyihii Baarlamaanka Koofur Galbeed,haatan ka mid ah xildhibaanada cusub ee Baarlamaanka Dr. Cali Saciid Fiqi, ayaa qoraal uu ku daabacay bartiisa X (Twitter) ku sheegay in ciidamadaasi loo daadgureeyey deegaannada ku xeeran Baydhabo. Wuxuu tallaabadan ku tilmaamay mid muujinaysa awood sheegasho.
Dr. Fiqi ayaa carrabka ku adkeeyey in maamulka Koonfur Galbeed uusan aqbali doonin wax cabsi gelin ah, isagoo xusay in haddii dhaqdhaqaaqaasi la xiriirto cadaadis siyaasadeed, ay diyaar u yihiin inay si adag uga falceliyaan.
Dhaqdhaqaaqa ciidamada ayaa imaanaya xilli ay cirka isku shareertay xiisadda siyaasadeed ee u dhaxeysa dowladda federaalka Soomaaliya iyo qaar kamid ah dowlad goboleedyada, taas oo mararka qaar saameyn ku yeelata xaaladaha amni iyo maamul ee deegaanada.
Xaaladda gobolka Baay ayaa weli ah mid feejignaan leh, iyadoo laga cabsi qabo in khilaafka siyaasadeed uu isu rogo mid amni, taas oo si toos ah u saameyn karta shacabka ku nool deegaannadaas.
