Guddoomiyaha Golaha Shacabka ee Baarlamaanka Soomaaliya ayaa si rasmi ah u beeniyay warar lagu faafiyay baraha bulshada oo sheegaya in mooshin ka dhan ah Madaxweynaha Soomaaliya, Xasan Sheekh Maxamuud, loo gudbiyay Golaha Shacabka.
Qoraal kasoo baxay xafiiska Guddoomiyaha ayaa lagu caddeeyay in aanu jirin wax mooshin ah oo si rasmi ah u soo gaaray Golaha, iyadoo wararkaasi lagu tilmaamay kuwo been abuur ah oo aan sal iyo raad toona lahayn.
Xafiiska Guddoomiyaha ayaa sidoo kale adkeeyay in Golaha Shacabka uu leeyahay habraacyo cad oo sharci ah, isla markaana mooshin kasta uu maro nidaam dastuuri ah oo qeexan ka hor inta aan la horkeenin Golaha.
Dhanka kale, qoraalka ayaa digniin u diray dadka faafinaya wararka aan la hubin, iyadoo lagu booriyay shacabka iyo warbaahinta inay ka fogaadaan faafinta xogaha marin habaabinta ah, isla markaana ay ku tiirsanaadaan wararka rasmiga ah.
Ugu dambeyn, Xafiiska Guddoomiyaha Golaha Shacabka ayaa mar kale caddeeyay in uusan jirin wax mooshin ah oo ka dhan ah Madaxweynaha oo soo gaaray Golaha, islamarkaana wararkaasi ay yihiin kuwo gebi ahaanba aan sax ahayn.
