Maamulka Koofur Galbeed ayaa cambaareeyay waxa uu ku tilmaamay “marin-habaabin iyo dacaayado”ka imaanaysa Dowladda Federaalka, kuwaas oo ay sheegtay in ay halis ku yihiin xasilloonida iyo midnimada dalka.
War-saxaafadeed kasoo baxay wasaaradda warfaafinta maamulka Koonfur Galbeed ayaa sidoo kale walaac xooggan looga muujiyay heshiisyo qarsoodi iyp wada shaqayn uu maamulka Koonfur Galbeed sheegay inuu ka dhexeeyo dowladda federaalka iyo kooxda Al-Shabaab.
Eedeyntan oo ah culus ayaa lagu sheegay inay khatar ku tahay amniga qaranka iyo badqabka shacabka.
“Dowladda Koonfur Galbeed waxay arrintaas u aragtaa mid khatar toos ah ku ah amniga qaranka, midnimada dalka, iyo badqabka shacabka Soomaaliyeed,” ayaa lagu yiri warkan.
War-saxaafadeedka ayaa lagu sheegay in ay jiraan caddeymo muujinaya isku milan iyo wada-shaqeyn dhinaca saraakiisha iyo agabka militari ah, inkasta oo maamulka Koonfur Galbeed uusan soo bandhigin caddeymaha lagu xaqiijinayo eedeyntaas.
Warkan kasoo baxay Koonfur Galbeed ayaa kusoo aaday, iyadoo Dowladda Federaalka ay ku eedeysay Madaxweynaha Maamulka Koonfur Galbeed Cabdicasiis Laftagareen, iyo Guddoomiyaha baarlamaanka ee Maamulkaas inay si dadban u taageereen ama u dhiirrigeliyeen kooxda Al-shabaab.
