Taliyaha qeybta guud ee Booliska Gobolka Banaadir Macallin Mahdi ayaa digniin culus u diray dadka ka aragti duwan Dowladda Federaalka Soomaaliya iyo bannaanbaxayaasha qorsheynaya isu soo baxa ka dhacaya magaalada Muqdisho.
Hadalkaan ayuu jeediyay kaddib shir amni oo ka dhacay Muqdisho, kaas oo looga hadlay xaaladda amniga caasimadda iyo dhaq-dhaqaaqyada siyaasadeed ee maalmihii dambe ka jiray magaalada.
Macallin Mahdi ayaa sheegay in aan la aqbali doonin falal lagu qalqal gelinayo amniga iyo xasilloonida Muqdisho, isagoo digniin u diray kooxaha abaabulaya bannaanbaxyada iyo siyaasiyiinta mucaaradka ah ee dowladda dhaliila.
Sidoo kale, wuxuu carrabka ku adkeeyay in ciidamada ammaanka ay diyaar u yihiin sugidda amniga magaalada, islamarkaana tallaabo adag laga qaadi doono cid kasta oo lagu tuhmo inay hurineyso khalalaase ama rabshado siyaasadeed.
Hadalkan ayaa imanaya xilli ay cirka isku sii shareerayaan xiisadaha siyaasadeed ee u dhexeeya Dowladda Federaalka iyo mucaaradka, kuwaas oo ku baaqay bannaanbaxyo waaweyn oo la filayo inay ka dhacaan Muqdisho maalinta beri ah.
