Hoggaamiyaha ku meel gaarka ah ee Koonfur Galbeed Jibriil Cabdirashiid Xaaji ayaa ka qeybgalay Aas Qaran oo loo sameeyay saraakiishii ku geeriyootay dagaalkii shalay ka dhacay duleedka magaalada Baydhabo ee ay kala ahaayeen Taliyaasha Guutooyinka 8-aad iyo 9-aad ee Ciidanka Xooga Dalka.
Aas-qaranka ayaa waxaa ka qeybgalay Gudoomiyaha Golaha Shacabka Baarlamaanka Dalka, Wasiiro iyo Xildhibaano ka tirsan Dowlada Federaalka, masuuliyiin ka tirsan Dowladda Koonfur Galbeed, saraakiisha ciidamada qalabka sida, waxgarad iyo qeybaha kala duwan ee bulshada, kuwaas oo dhammaantood muujiyay murugada iyo tacsida ay la wadaagayaan qoysaska, ehelada iyo shacabka Soomaaliyeed.
Jibriil Cabdirashiid Xaaji Hogaamiyaha KMG ah ee Dowladda Koonfur Galbeed ayaa sheegay in saraakiishii shahiiday ay naftooda u hureen difaaca shacabka iyo ilaalinta amniga deegaanada Dowladda Koonfur Galbeed, isagoo ku tilmaamay halyeeyo qaran oo door weyn ka qaatay sugidda nabadda iyo xasilloonida.
Hogaamiyaha ayaa sidoo kale ciidamada ku bogaadiyay dadaalka joogtada ah ee ay ugu jiraan ciribtirka kooxaha nabad-diidka ah, wuxuuna shacabka ugu baaqay inay garab istaagaan ciidamada amniga si loo xaqiijiyo amni iyo xasillooni waarta.
Hogaamiye Jibriil ayaa Alle uga baryey saraakiishii geeriyootay inuu janadii Firdowsa ka waraabiyo, samir iyo iimaanna ka siiyo dhammaan eheladii iyo qarankaba.
