Dowladda Federaalka Soomaaliya ayaa markii ugu horreysay si cad u sheegtay in dalka uu galay marxalad “kala-guur” ah, xilli ay sii xoogeysanayaan khilaafaadka siyaasadeed iyo muranka hareeyay doorashooyinka iyo amniga dalka.
Wasiirka Gaashaandhigga Soomaaliya Axmed Macalin Fiqi ayaa sheegay in xilliyada kala-guurka ay inta badan soo baxaan kooxo uu ku tilmaamay “dad tuugo ah” oo bulshada qalqal geliya.
Fiqi ayaa yiri:“Xilliyada kala-guurka oo xilliyadan oo kale ah dad badan oo tuugo ah ayaa ummadda khalkhal geliya, kuwaas halkooda ayaan ku cabudhinaynaa, mucaaridkana waxaan u oggol nahay Hotel Jazeera halkaas dadka ha kala hadlaan.”
Hadalka Wasiirka ayaa loo fasirtay weerar toos ah oo afka ah oo uu ku qaaday siyaasiyiinta mucaaradka, kuwaas oo maalmihii lasoo dhaafay dowladda ku cadaadinayay arrimaha doorashooyinka, dastuurka iyo maamulka dalka.
Sidoo kale, hadalka “xilli kala-guur” ayaa noqday mid si weyn loogu falanqeynayo baraha bulshada iyo goobaha siyaasadda, iyadoo dad badan ay su’aal gelinayaan waxa ay dowladda uga jeeddo marxaladdan cusub iyo halka ay dalka u horseedi karto.
Mucaaradka Dowladda Federaalka ayaa hore ugu eedeeyay Villa Soomaaliya inay waddo siyaasad cadaadis iyo caburin ah, halka dowladda ay dhankeeda ku doodday inay ilaalinayso amniga iyo xasilloonida dalka.
Xiisadda siyaasadeed ee u dhexeysa dowladda iyo mucaaradka ayaa sii xoogeysaneysa, iyadoo hadallada adag ee kasoo baxaya labada dhinac ay muujinayaan jawi siyaasadeed oo aad u kacsan.
