Madaxweynaha Muddo xileedkiisa dhammaaday ee Xasan Sheekh Maxamuud ayaa qadka taleefoonka kula hadlay Axmed Aboul Gheit, Xoghayaha Guud ee Ururka Dowladaha Carabta.
Labada dhinac ayaa ka wadahadlay xaaladda Soomaaliya iyo gobolka Geeska Afrika, gaar ahaan khataraha ka imaan kara faragelinta Israa’iil.
Sidoo kale madaxda ayaa cambaareeyay wararka sheegaya in maamul goboleedka waqooyi-galbeed ee Somaliland uu qorsheynayo inuu furto safaarad uu ku leeyahay magaalada Quddus ee la haysto.
Waxaa kale oo la adkeeyay baahida loo qabo in si wadajir ah looga hortago tallaabadan.
Afhayeenka Xoghayaha Guud, Gamal Roshdy, ayaa sheegay in labada dhinac ay adkeeyeen taageerada xasilloonida iyo nabadda gobolka, ilaalinta madax-bannaanida, xasiloonida, iyo midnimada dhuleed ee Soomaaliya, iyo diidmada isku day kasta oo lagu wiiqi karo madax-bannaanida dalka oo xubin ka ah Ururka Carabta, Midowga Afrika, iyo Qaramada Midoobay.
Xoghayaha Guud ayaa sidoo kale xaqiijiyay in Ururka Carabta uu si buuxda u taageerayo Soomaaliya dhammaan tallaabooyinka ay qaadayso si ay ula tacaasho cadaadis kasta ama isku day kasta oo khatar gelin kara midnimadeeda iyo madaxbannaanideeda, isla markaana uu taageerayo dadaallada dowladda federaalka ah ee lagu xoojinayo wadahadalka qaran si loo gaaro heshiis siyaasadeed iyo xasilooni, si loo fuliyo danaha iyo rajada shacabka Soomaaliyeed.
