Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya, Sheekh Aadan Maxamed Nuur (Madoobe), ayaa kulan la qaatay Taliye Ku-xigeenka Ciidanka Dhulka ee Xoogga Dalka Soomaaliyeed, Jeneraal Cabdullaahi Aadan Xuseen (Cirro), Taliyaha Qeybta 60-aad ee Ciidanka Xoogga Dalka, Korneel Isaaq Berdaale, iyo Taliyaha Nabad-sugidda Koonfur Galbeed, Macalin Saalax Cabdinuur Cali.
Kulanka ayaa diiradda lagu saaray xaaladda amni ee magaalada Baydhabo, iyadoo saraakiishu ay Guddoomiyaha Golaha Shacabka warbixin ka siiyeen shaqaaqadii maanta ka dhacday magaalada iyo howlgalada ay ciidamada amniga ka sameeyeen.
Saraakiisha ayaa sheegay in ciidamada ammaanka ay ku guuleysteen soo afjaridda howlgal lagu beegsaday maleeshiyaad la sheegay inay isku dayayeen inay falal amni-darro ka geystaan gudaha magaalada Baydhabo.
Guddoomiye Sheekh Aadan Madoobe ayaa ciidamada amniga uga mahadceliyay dadaallada ay ku xaqiijinayaan amniga magaalada, wuxuuna bogaadiyay doorka ay ka qaateen ka hortagga falalka lagu carqaladeynayo xasilloonida Baydhabo.
Sidoo kale, Guddoomiyuhu wuxuu ku ammaanay ciidamada kala duwan ee amniga heeganka iyo howlgalada ay wadaan, isagoo ku dhiirrigeliyay inay sii xoojiyaan dadaallada lagu sugayo nabadda iyo amniga shacabka.
