Dowladda Federaalka Soomaaliya ayaa sheegtay in howlgal qorsheysan oo ay Ciidanka Xoogga Dalka Soomaaliyeed ka fuliyeen deegaanka Hanti Wadaag ee gobolka Shabeellada Hoose lagu dilay laba xubnood oo ka tirsanaa maleeshiyaadka Al-Shabaab, kuwaas oo uu ku jiray horjooge sare.
Sida lagu sheegay war-saxaafadeed rasmi ah, howlgalka ayaa lagu khaarajiyay horjooge lagu magacaabi jiray Abuu Cabdalla, kaas oo la sheegay inuu muddo dheer ku lug lahaa abaabulka iyo fulinta weerarro iyo falal amni-darro oo ka dhacay deegaanno ka tirsan gobolka Shabeellada Hoose.
Dowladdu waxay sheegtay in horjoogahan uu door muhiim ah ku lahaa qorsheynta iyo hagidda dhaqdhaqaaqyada maleeshiyaadka Al-Shabaab ee gobolka, isla markaana howlgalka lagu dilay sidoo kale waardiyihiisii gaarka ahaa.
Howlgalkan ayaa qeyb ka ah dadaallada joogtada ah ee Ciidanka Xoogga Dalka Soomaaliyeed ay ku bartilmaameedsanayaan horjoogayaasha iyo maleeshiyaadka Al-Shabaab, si loo wiiqo awooddooda loona xoojiyo amniga deegaannada ay ka howlgalaan.
Wasaaradda Gaashaandhigga iyo Taliska Ciidanka Xoogga Dalka Soomaaliyeed ayaa sheegay in howlaha ka dhanka ah Al-Shabaab ay sii socon doonaan, iyadoo la adkeynayo dadaallada lagu sugayo amniga, xasilloonida iyo badqabka shacabka Soomaaliyeed.
