Dowladda Uganda ayaa lagu warramay inay mabda’ ahaan oggolaatay inay ciidamo ku biiriso howlgal caalami ah oo la qorsheynayo in laga hirgeliyo Marinka Gaza, kadib codsi uga yimid Madaxweynaha Mareykanka Donald Trump.
Sida uu qoray wargeyska dowladda Uganda ee New Vision, oo soo xigtay ilo sare oo ka tirsan ciidamada, Madaxweyne Yoweri Museveni ayaa si wanaagsan uga jawaabay codsiga Trump ee ahaa in Uganda ay qeyb ka noqoto Ciidanka Xasilinta Caalamiga ah ee Gaza.
Wararka ayaa sheegaya in ciidanka la qorsheynayo ay ka shaqeyn doonaan sugidda amniga, ilaalinta shacabka, fududeynta gaarsiinta gargaarka bani’aadannimo iyo taageeridda dib u dhiska Gaza kadib colaaddii muddada dheer socotay.
Hase yeeshee, Taliska Ciidamada Difaaca Uganda (UPDF) weli si rasmi ah uma shaacin xilliga la diri doono ciidamada ama tiradooda, iyadoo saraakiisha milatarigu sheegeen in tallaabada ugu dambeysa ay ku xirnaan doonto go’aanka Madaxweynaha Museveni.
