Dowladda Federaalka Soomaaliya ayaa war rasmi ah ka soo saartay dagaal beeleed ka socda deegaanka Dawaco ee degmada Badhan, Gobolka Sanaag, kaas oo u dhexeeya laba maleeshiyo beeleed.
War-saxaafadeed ay soo saartay Wasaaradda Arrimaha Gudaha, Federaalka iyo Dib-u-heshiisiinta ayaa lagu sheegay in dowladda ay si dhow ula socoto colaadda ka aloosan deegaankaasi, isla markaana ay walaac weyn ka muujisay khasaaraha iyo xaaladda amni ee ka dhalatay dagaalka.
Wasaaraddu waxay ugu baaqday dhinacyada ku lugta leh colaadda inay si degdeg ah u joojiyaan dagaalka, kana fogaadaan tallaabo kasta oo sii hurin karta xiisadda.
Sidoo kale, waxay ku boorrisay odayaasha dhaqanka, culimada, haweenka, dhallinyarada iyo maamulka deegaanka inay ka shaqeeyaan nabadeynta iyo dib-u-heshiisiinta bulshada.
Dowladda Federaalka ayaa caddeysay inay garab taagan tahay dadaal kasta oo lagu soo afjarayo colaadda, laguna xaqiijinayo nabad waarta iyo xasillooni ka dhalata deegaanka ay dagaalladu ka socdaan.
Wasaaradda ayaa ugu dambeyn ku baaqday in mudnaanta la siiyo wada-hadal, is-afgarad iyo ilaalinta nabadda, iyadoo shacabka loogu baaqay inay ka qeyb qaataan dadaallada lagu joojinayo colaadda.
