Taliska Qaybta Booliska Gobolka Bari ayaa magaalada Boosaaso ka fuliyey howlgal qorshaysan oo lagu bartilmaameedsaday shabakad lagu eedeeyay ka ganacsiga maandooriyaha iyo hubka sharci-darrada ah, sida lagu sheegay warka Booliska.
Howlgalka oo laga sameeyey xaafadaha Laanta-Hawada iyo Xaafatu-Carab, ayaa lagu soo qabtay xubno muhiim ah oo lagu tuhunsan yahay inay ka tirsanaayeen shabakadda.
Booliska ayaa sidoo kale sheegay in howlgalka lagu soo qabtay shixnado xashiish ah, qori AK-47 ah iyo bambooyin gacanta laga tuuro, kuwaas oo la sheegay in shabakadda ay u adeegsan jirtay hawlaheeda sharci-darrada ah.
Dadka la qabtay ayaa lagu tuhunsan yahay inay doorar kala duwan ku lahaayeen kaydinta, qaybinta iyo iibinta maandooriyaha, waxaana socda baaritaanno dheeraad ah oo lagu xaqiijinayo eedeymaha loo jeediyay.
Taliska Booliska Gobolka Bari ayaa sheegay in howlgalada ka dhanka ah maandooriyaha iyo hubka sharci-darrada ah ay sii socon doonaan, iyadoo dadka lagu soo qabtay howlgalka loo gudbin doono hay’adaha caddaaladda si sharciga loo waafajiyo.
