Warar soo baxaya ayaa sheegaya in madaxda maamul goboleedyada Puntland iyo Jubbaland, Siciid Cabdullaahi Deni iyo Axmed Maxamed Islaam (Axmed Madoobe), lagu cadaadinayo inay tagaan magaalada Muqdisho, si ay goobjoog uga noqdaan heshiis siyaasadeed oo ku saabsan doorashooyinka Soomaaliya, kaas oo ay wada gaareen dhinacyada mucaaradka iyo Villa Soomaaliya.
Dadaalladan waxaa hormuud ka ah Beesha Caalamka, oo muddooyinkii lasoo dhaafay waday dadaallo lagu doonayo in dhinacyada siyaasadda Soomaaliya la isugu keeno, laguna gaaro heshiis looga gudbo khilaafka ka taagan hannaanka doorashooyinka
Wararka ayaa sheegaya in inta badan qodobada heshiiska doorashooyinka la isku fahmay, iyadoo labada dhinac ay sameeyeen tanaasulaadyo siyaasadeed oo labada dhinac ah, si loo helo hannaan ay dhinacyadu wada aqbali karaan.
Si kastaba, waxaa weli taagan qodob la xiriira doorka Beesha Caalamka iyo dammaanadda heshiiska, kaas oo caqabad ku noqday in heshiiska loo gudbo marxaladda kama dambaysta ah.
Deni iyo Axmed Madoobe ayaa la sheegay inay ku adkaysanayaan in Beesha Caalamku aysan ku ekaan oo keliya fududeynta iyo dhex-dhexaadinta wada-hadallada, balse ay si rasmi ah qayb uga noqoto heshiiska, isla markaana saxiixe ama dammaanad-qaade loogu daro nuqulka kama dambaysta ah.
