Sacuudi Carabiya ayaa xaqiijisay in Xuutiyiinta Yemen ay isku dayeen inay Riyadh, caasimadda dalka, ku bartilmaameedsadaan gantaal ballistic ah.
Tani waa weerarkii ugu horreeyay ee lagu qaado Riyadh tan iyo markii ay sii xooggaysatay xiisada.
Horey, Xuutiyiintu waxay iyagoo adeegsanaya gantaallo iyo diyaarado aan duuliye lahayn ku bartilmaameedsadeen goobo “xasaasi” ah oo ku yaalla Riyadh, caasimadda Sacuudiga.
Sacuudi Carabiya waxay sheegtay in gantaalkii lagu soo riday Riyadh “la qabtay oo la burburiyay.”
Wakaaladda Associated Press ayaa sheegtay in qaar ka mid ah dadka deggan Riyadh ay maqleen qarax, kaddibna ay arkeen qiiq madow ooka kacaya meel u dhow garoonka diyaaradaha.
AFP-na waxay sheegtay in laba qarax oo xooggan laga maqlay Riyadh Sabtidii, iyadoo wariyayaasheeduna ay arkeen haan shidaal oo ay leedahay shirkadda shidaalka ee Saudi Aramco, oo ku dhow garoonka diyaaradaha, oo dab qabsaday.
Khilaafka u dhexeeya Sacuudi Carabiya iyo Xuutiyiinta ayaa galay marxalad cusub. Xuutiyiintu waxay gacanta ku hayaan qayb weyn oo ka mid ah Yemen, waxaana dhowaan ay qabsadeen magaalooyin xeebeedyo ku dhow Marinka Bab al-Mandab iyo jasiiradihiisa.
Maraykanka ayaa Sabtidii ka digay in colaadda u dhexeysa Sacuudi Carabiya iyo Xuutiyiinta oo ay Iran taageerto ay “si degdeg ah u sii xoogaysan karto.”
