Maamulka Puntland ayaa bilaabay laba howlgal oo dhinacyada dhulka iyo badda ah, kuwaas oo laga wado deegaanno ka tirsan Puntland.
Howlgalka koowaad oo lagu magacaabay “Onkad” ayaa ka socda Buuraha Calmadow ee Gobolka Sanaag, halkaas oo maamulka Puntland uu sheegay inuu uga hortagayo maleeshiyaadka Al-Shabaab ee la sheegay inay saldhigyo ka sameysteen buurahaasi.
Maamulka Puntland ayaa lagu soo warramayaa inuu kumannaan ka tirsan ciidamadiisa milatariga u daabulayo dhanka Buuraha Calmadow, iyadoo ciidamadaasi loo diyaarinayo howlgal lagu doonayo in lagu beegsado saldhigyada kooxda Al-Shabaab ee halkaasi ku sugan.
Wararka kasoo baxaya maamulka Puntland ayaa sidoo kale sheegaya in kooxda Al-Shabaab ay xiriir la sameysay Xuutiyiinta Yemen, isla markaana xubno ka tirsan kooxda ay tababbarro ku qaateen deegaannada buuraha Calmadow. Arrintan ayaa ah eedeyn uu maamulka Puntland jeediyay, mana jirto xaqiijin madax-bannaan oo arrintaas ku saabsan.
Dhanka kale, maamulka Puntland ayaa ciidamo wata maraakiib dagaal ka howlgeliyay xeebaha, iyadoo howlgalkaasi lagu sheegay mid looga gol leeyahay la dagaallanka burcad-badeedda iyo kooxaha hubeysan ee kusoo badanayay xeebaha Puntland.
Sidaas darteed, labada howlgal ayaa isku mar ka socda buuraha iyo badda, iyadoo maamulka Puntland uu sheegay inuu ku doonayo in lagu xoojiyo amniga dhulka iyo xeebaha.
