Maamulka Koofur Galbeed ee uu hoggaamiyo Sheekh Aadan Maxamed Nuur ayaa wada qorshe lagu dhisayo ciidamo gaar ah oo loo sameynayo degmo kasta oo ka tirsan maamulka Koonfur Galbeed.
Ciidamadan ayaa loo qorsheeyay inay qaabilaan sugidda amniga degmooyinka iyo deegaanada Koonfur Galbeed, isla markaana ay kaalin ka qaataan xoojinta ammaanka iyo la dagaallanka maleeshiyaadka Al-Shabaab.
Qorshahan ayaa kusoo aadaya xilli duleedka magaalada Baydhabo laga dareemayo dhaqdhaqaaqyo militari oo ay wadaan ciidamo taabacsan madaxweynihii hore ee Koonfur Galbeed, Cabdicasiis Xasan Maxamed Lafta-gareen.
Wararka ayaa sheegaya in qorshaha ciidamada degmooyinka uu qeyb ka yahay tallaabooyinka uu maamulka Sheekh Aadan Maxamed Nuur ku doonayo inuu kaga hortago abaabulka la sheegay in Lafta-gareen iyo xubno taageersan ay ka wadaan deegaanada Koonfur Galbeed.
Xaaladda ayaa kusoo aadeysa xilli ay sii kordhayaan dhaq-dhaqaaqyada siyaasadeed iyo kuwa amni ee ka jira magaalada Baydhabo iyo nawaaxigeeda.
