Madaxweynaha Dowladda Hirshabeelle Cali Cabdullaahi Xuseen (Cali Guudlaawe) ayaa si rasmi ah u furay kal-fadhiga 17-aad ee Baarlamaanka Dowladda Hirshabeelle.
Ugu horeyn Guddoomiyaha Baarlamaanka Dowladda Hirshabeelle Cabdixakiin Luqmaan Xaaji Maxamed ayaa Madaxweynaha kusoo dhaweeyay fadhiga Baarlamaanka.
Madaxweynaha Dowladda Hirshabeelle ayaa jeediyay khudbad uu kaga hadlay arrimo dhowr ah.
“Siyaasad xasiloon ayaad ku shaqeyseen, Guddoonka iyo Xildhibaanada Hirshabeelle waxay kaalin weyn ka qaateen howlgalka dabar-goynta Khawaarijta.”
Sidoo kale Madaxweyne Cali Guudlaawe ayaa weerar afka ah ku qaaday Xildhibaan Xaadoole oo ka mid ah xildhibaanada golaha shacabka, oo dhawaan eedeyn u jeediyay madaxweynaha Hirshabelle.
“Nin ku haminayo inuu isbaaro dhigto oo aan Xaadoole aheyn ma jiro, maalinta lagu doortay ilaa iyo hadda waxaa taagan tahay degmooyinka Balcad iyo Warsheekh inta u dhexeysa, Xildhibaan Xaadoole ka fogow wixii horey laguugu yaqaanay”.
