Maamulka Gobolka Banaadir ayaa si rasmi ah ugu dhawaaqay in uu la wareegay guri ku yaal degmada Xamarjajab, kaasi oo la sheegay in ay ka dhaceen falal lidi ku ah amniga Qaranka.
Gurigan ayaa waxaa lahaa Fahma Warsame, waxaana afhayeenka maamulka Gobolka Banaadir uu sheegay in gurigaasi noqday meel lagu hayay falal amniga lidi ku ah, iyadoona gurigan uu dhawaan ka dhacay qarax lala eegtay kolonyo gaadiid ah oo la socday madaxweynaha Soomaaliya Xasan Sheekh.
Gurigan, oo ku yaala Isgoyska Ceel-gaabta ee degmada Xamarjajab, ayaa ka mid ah goobaha muhiimka ah ee magaalada Muqdisho, islamarkaana ay isticmaalaan madaxda ugu sareysa ee dowladda Soomaaliya.
Afhayeenka ayaa sidoo kale waxaa uu sheegay in gurigan loogu adeegi doono danta guud ee dalka.
Maamulka Gobolka Banaadir ayaa sheegay inay ka go’an tahay sidii ay u xaqiijin lahaayeen nabadgelyada magaalada Muqdisho.
