Xaaladda u dhaxaysa Hindiya iyo Pakistan ayaa gaartay halkii ugu darneyd, kadib markii Hindiya ay bilowday weerar ballaaran kaas oo lagu bartilmaameedsaday sagaal goobood oo ku yaalla gudaha Pakistan iyo Kashmir qeybta ay maamusho Pakistan.
Weerarradan ayaa jawaab u ahaa weerarkii argagixiso ee ka dhacay Pahalgam 22-kii Abriil, kaasoo lagu dilay 26 qof oo u badnaa dalxiisayaal Hindu ah.
Hindiya waxay sheegtay in weerarradaas ay ka dambeeyeen kooxo taageero ka hela Pakistan.
Sida laga soo xigtay Wasaaradda Difaaca ee Hindiya, weerarrada waxaa lagu dhaqaaqay iyadoo la adeegsanayo gantaallo fogaan-dheer ah,islamarkaana aan la gelin hawada Pakistan.
Hindiya waxay sheegtay in weerarrada lagu dilay 17 dagaalyahan, halka 60 kalena lagu dhaawacay .
Dhinaca kale, Pakistan waxay sheegtay in weerarrada ay sababeen dhimashada saddex qof oo rayid ah, oo uu ku jiro ilmo, iyo dhaawaca in ka badan toban kale.
Sidoo kale, Pakistan waxay sheegtay in ay soo ridday laba diyaaradood oo Hindi ah isla markaana ay burburisay xarun talis oo Hindi ah .
Ra’iisul Wasaaraha Pakistan, Shehbaz Sharif, ayaa weerarrada Hindiya ku tilmaamay “fal dagaal” oo aan la aqbali karin, isagoo ballanqaaday in dalkiisu uu qaadi doono tallaabooyin adag oo jawaab celin ah.
Pakistan waxay sidoo kale ku dhawaaqday xaalad degdeg ah gobolka Punjab, waxayna hakisay duulimaadyadii ganacsiga ee gudaha dalka .
Beesha caalamka, oo ay ka mid yihiin Qaramada Midoobay iyo Mareykanka, ayaa ku baaqay in labada dal ay muujiyaan xakameyn si looga fogaado dagaal ballaaran oo ka dhex qarxa labada quwadood ee nukliyeerka leh.
Sidoo kale, Hindiya ayaa hakisay Heshiiskii Biyaha Indus, iyadoo Pakistan ay ku eedeysay in ay si ula kac ah u yaraysay qulqulka biyaha Webiga Chenab, taasoo sii hurisay xiisadda .
Xiisaddan cusub ayaa ah tii ugu halista badneyd ee ka dhex dhacda Hindiya iyo Pakistan tan iyo sanadkii 2019, iyadoo khubaradu ay ka digayaan in haddii aan si degdeg ah loo xallin, ay keeni karto dagaal ballaaran oo saameyn ku yeesha gobolka iyo caalamkaba.
