Ciidamada Xoogga Dalka  oo garabsanaya kuwa dadka deegaanka ayaa maanta weerar culus ku qaaday maleeshiyaadka Al-Shabaab, kuwaas oo ku sugnaa inta u dhexeysa degmada Aadan Yabaal iyo deegaanka Ceeldheere Buraale ee gobolka Shabeellaha Dhexe.
Weerarkan ayaa kusoo aadaya  iyadoo dagaallo halkaasi ka socday ay galeen maalintii labaad, iyadoo la xaqiijiyey in ay jiraan khasaare labada dhinac soo kala gaaray, inkastoo aan weli faahfaahin rasmi ah laga helin tirada dhimashada iyo dhaawaca.
Labada dhinac  ayaa xalay isku hor fadhiyay jiida hore ee dagaalka, iyadoona saaka uu dagaal ka qarxay.
Saraakiisha ciidamada dowladda ayaa sheegay in howlgalka uu qayb ka yahay qorshaha lagu ciribtirayo kooxda Al-Shabaab ee ku dhuumaaleysanaya deegaannada gobolka.
Howlgalkan ayaa qayb ka ah dadaallada isdaba joogga ah ee dowladda federaalka ah ee Soomaaliya ay ku doonayso in ay Al-Shabaab uga saarto deegaannada ay weli gacanta ku hayaan, iyadoo taageero ka helaysa dadka deegaanka.
