Waxaa lagu wadaa in Taliyaha cusub ee Hay’adda Sirdoonka iyo Nabad Sugidda Qaranka (NISA), Mahad Maxamed Salaad, uu maanta si rasmi ah xilka ula wareego, kaddib xil-wareejin ka dhacaysa Muqdisho.
Xilka waxa uu kala wareegayaa Taliyihii hore ee NISA, Cabdullaahi Maxamed Cali (Sanbaloolshe), oo xilkan hayay muddo kooban , tan iyo markii dib loogu magacaabay, Sanbaloolshe ayaa horey u soo noqday taliyaha NISA sanadkii 2017.
Dhanka kale, Mahad Maxamed Salaad ayaa xilkan markiisii hore loo magacaabay bisha Agoosto 2022, wuxuuna xilka hayay muddo 2 sano ah, kahor inta aan laga bedelin bartamihii 2024. Haddana, mar kale ayaa dib loogu soo celiyay xilka, taas oo muujineysa kalsoonida lagu qabo doorkiisa ku aaddan amniga qaranka.
Xil-wareejintan ayaa ku soo beegmeysa iyadoo ay dalka ka jiraan xaalado amni oo aad u xasaasi ah, waxaana laga filayaa in Taliyaha cusub uu wajaho caqabado iyo hawlo adag oo la xiriira dib-u-habeynta hay’adda, la dagaallanka argagixisada, iyo xoojinta sirdoonka gudaha iyo dibadda.
Waxaa la filayaa in madasha xil-wareejinta ay goob joog ka noqon doonaan mas’uuliyiin sare oo ka tirsan dowladda Federaalka, saraakiil ciidan, iyo marti sharaf kale, iyadoo la dareemayo feejignaan amni oo sareysa.
