Taliyaha Ciidanka Dhulka Xoogga Dalka Soomaaliyeed, Jeneraal Sahal Cabdullaahi Cumar, ayaa tagay deegaanka istiraatiijiga ah ee Bariire ee gobolka Shabeellaha Hoose, halkaasi oo Ciidanka Xoogga Dalka iyo Ciidamada Uganda ee UPDF ay ka xoreeyeen maleeshiyaadka Al-shabaab.
Intii uu socday kormeerka, Jeneraal Sahal ayaa tagay gododkii iyo xarumihii maleeshiyaadka Al-shabaab laga saaray, halkaas oo lagu arkayay meydad badan oo kooxda ah, hub farabadan iyo saanado kale oo ciidan oo ay ka carareen.
Jeneraal Sahal Cabdullaahi Cumar ayaa bogaadiyay guusha ay gaareen ciidamada xoogga iyo kuwa ciidanka Uganda, isaga oo ku dhiirrigeliyay inay sii laba-laabaan dadaallada lagu ciribtirayo kooxaha Al-shabaab ee dhibaatada ku haya shacabka Soomaaliyeed.
Sidoo kale taliyaha ayaa sheegay in maleeshiyaadka Al-shabaab ay godad ka qoteen guryo ay deganayaan dadka shacabka ee ku yaala deegaanka Bariire.
