Ciidanka Hay’adda Sirdoonka Qaranka ee NISA ee ka howlgala deegaanada Koonfur Galbeed, ayaa magaalada Baydhaba ku soo bandhigay afar dhalinyaro ah oo ka tirsanaa Al Shabasb, kuwaas oo isku soo dhiibay dowladda.
Dhammaan isa soo dhiibayaashaan waxay sheegeen inay si gaar ah uga tirsanaayeen kooxaha ay Al Shabaab ugu yeeraan Jabhadaha, waxaana ku adkaatay nolosha adag ee cadowga duurka ku heysata iyo weerarrada ay kala kulmayaan Ciidamada Qaranka.
Ragan lasoo bandhigay ayaa sidoo kale sheegay in ay u adkeysan waayeen dhibaatada kooxda Al Shabaab ku hayaan shacabka Soomaaliyeed, waxa ayna ugu baaqeen saaxiibadood in ay kasoo goostaan kooxda iskuna soo dhiibaan dowladda.
Magaalada Baydhabo, ayaa marar badan lagu soo bandhigay xubno badan oo kasoo goostay kooxda Al Shabaab, kuwaa la geeyay xarumaha dhaqancelinta ee la geeyo xubnaha Al Shabaab kasoo taga.
