Soomaaliya ayaa ka hadashay dilkii shirqoolka ahaa ee lagu dilay hoggaamiyihii Ururka Xamaas Isma’il Haniyeh, kaasi oo lagu dilay magaalada Caasimadda ah ee dalka Iraan ee Tehran.
“Jamhuuriyadda Federaalka Soomaaliya waxay cambaareynaysaa dilka maamulka Israa’iil uu u geystay hogaamiyihii xafiiska siyaasadda ee Xamaas Ismaaciil Haniya, allaha u naxariistee, kaas oo ka dhacay magaalada Tehran ee dalka Iiraan, falkaas oo ka soo horjeeda sharciga caalamiga ah ee bani’aadamnimada” ayaa lagu yiri warsaxaafadeed kasoo baxay Wasaaradda Arimaha dibadda Soomaaliya.
Sidoo kale war-saxaafadeedka ayaa lagu yiri “Soomaaliya waxay ka digaysaa kororka rabshadaha oo keeni kara xadgudubyo dheeraad ah oo ka dhan ah dadka rayidka ah, taasoo ka dhalin karta isku dhac ballaaran oo hubeysan bariga dhexe. Soomaaliya waxay cambaareynaysaa dilalka siyaasadeed iyo rabshadaha nooc kasta ah, iyadoo aan loo eegin sababaha ka dambeeya”
Dowladda Soomaaliya ayaa adkeysay baahida loo qabo in bulshada caalamku qaaddo mas’uuliyadooda oo ay qaadaan tallaabooyin deg-deg ah si loo joojiyo weerarka Israa’iil ee Gaza iyo xadgudubyada ay ku hayso sharciga caalamiga.
“Soomaaliya waxay u tacsiyeynaysaa dowladda Falastiin ee walaalaha ah, shacabka Falastiin, iyo qoyskii Dr. Haniya iyo asxaabtiisii, allaha u naxariistee” ayaa lagu soo gabagabeeyay Warsaxaafadeedka.
