Madaxweynaha dowladda Federaalka Soomaaliya Xasan Sheekh Maxamuud ayaa maanta gaaray magaalada Kismaayo ee gobolka Jubbada Hoose, halkaas oo uu kulan muhiim ah kula yeelanayo Madaxweynaha Jubbaland Axmed Maxamed Islaam (Axmed Madoobe).
Safarka Madaxweynaha ayaa imaanaya xilli labada dhinac uu horey uga dhaxeeyay khilaaf siyaasadeed oo xooggan, kaas oo salka ku hayay arrimaha Guddiga Doorashooyinka iyo dib-u-eegista Dastuurka, una sii gudbay eedeymo iyo gacan ka hadal siyaasadeed oo hore u kala fogeeyay labada hoggaamiye.
Kulankan oo lagu tilmaamay mid go’aan qaadasho ah, ayaa waxaa sidoo kale ka qeybgalaya wafdi diblomaasiyadeed oo ka socda dalalka Kenya, Imaaraadka Carabta iyo Itoobiya, kuwaas oo lagu tilmaamay inay door weyn ku leeyihiin dhexdhexaadinta iyo dejinta xiisadda labada dhinac.
Saraakiil ka tirsan wafdiga Kenya ayaa sheegay in Taliyaha Sirdoonka Qaranka Kenya, Nuuradiin Xaaji, uu kamid yahay xubnaha goob-joogga ka ah wada-hadallada.
Tan iyo markii ay labada hoggaamiye ku kala tageen shirkii Golaha Wadatashiga Qaran ee October 2024, tani waa markii ugu horreysay ee ay si fool-ka-fool ah u kulmaan.
Illaa hadda lama oga natiijada rasmiga ah ee ka soo bixi doonta wada-hadallada, balse cadaadis xooggan ayaa saaran labada dhinac si ay u gaaraan is-afgarad siyaasadeed oo dalka u horseeda xasillooni.
