Hoggaamiyihii ugu saameynta badnaa mucaaradka Kenya, isla markaana ahaa Ra’iisul Wasaarihii hore ee dalkaas, Raila Amolo Odinga, ayaa geeriyooday isagoo 80 jir ah.
Raila Odinga ayaa ku geeriyooday isbitaal ku yaalla dalka Hindiya, halkaas oo uu maalmahan ku jiray xaalad caafimaad oo lagu daweynayay, gaar ahaan xanuun dhanka wadnaha ah.
Odinga, oo ahaa Ra’iisul Wasaarihii Kenya intii u dhaxeysay 2008–2013, ayaa door muhiim ah ka qaatay siyaasadda Kenya iyo dib-u-heshiisiintii qaranka kadib doorashadii muranka dhalisay ee 2007.
Wuxuu ahaa hogaamiyaha xisbiga ODM (Orange Democratic Movement), waxaana loo aqoonsan yahay siyaasi muddo dheer u halgamayay dimoqraadiyadda, cadaaladda, iyo midnimada Kenya.
Odinga wuxuu kaloo caan ku ahaa heshiiskii “Handshake” ee taariikhiga ahaa ee uu la galay Madaxweynihii hore Uhuru Kenyatta sanadkii 2018, kaas oo soo afjaray xiisad siyaasadeed oo qaran, una horseeday Kenya xasilooni iyo dib u heshiisiin siyaasadeed.
Geerida Raila Odinga ayaa si weyn uga naxdin gelisay shacabka Kenya iyo guud ahaan Geeska Afrika.
