Isimmada Gobolka Bari ee Puntland ayaa soo saaray war-murtiyeed rasmi ah kadib shir maalmo uga socday magaalada Boosaaso, kaas oo ay kaga hadlayeen xaaladda guud ee Puntland iyo mustaqbalka maamulku leeyahay.
War-murtiyeedka ayaa lagu xusay dhowr qodob, waxaana ugu muhiimsanaa baaq ku wajahan Isimmada kale ee Puntland in ay si degdeg ah isugu yimaaddaan shirweyne guud, si dib-u-eegis iyo talo wadaag loogu sameeyo hanaanka iyo dhismaha Puntland-tii la asaasay sanadkii 1998.
Isimmadu waxay sheegeen in isbeddel muuqda uu ku yimi nidaamkii iyo mabda’ii Puntland, sidaas darteedna ay muhiim tahay in dib loo hagaajiyo wadashaqeynta iyo midnimada shacabka Puntland.
Dhanka kale, qaar kamid ah siyaasiyiinta mucaaridka Puntland ayaa si buuxda u taageeray baaqa Isimmada Bari, iyagoo sheegay in loo baahan yahay “Puntland cusub oo ku dhisan heshiis iyo wada-tashi cusub,” maadaama — sida ay sheegeen — “nidaamkii 1998 uu ku dhacay isbeddel iyo kala duwanaansho.”
Siyaasiyiintaas oo ay kamid yihiin xubno hore uga tirsanaa dowladda Puntland ayaa ku tilmaamay war-murtiyeedka Isimmada “tallaabo geesinimo leh oo lagu badbaadinayo Puntland iyo nidaamkeeda dowladnimo.”
