Wasaaradda caafimaadka Qasa oo ay maamusho Xamaas ayaa saaka sheegtay in ugu yaraan 20 qof ay dhinteen kadib weerar ay Israa’iil ku qaadday isbitaalka Nasser ee magaalada Khan Younis.
Wasaaraddu waxay sheegtay in dadka dhintay ay ka mid yihiin shaqaalaha caafimaadka, bukaanada iyo suxufiyiin, waxayna intaa ku dartay in adeegyada caafimaad ee isbitaalka uu saameeyay weerarkani.
Warbaahinta Al Jazeera ayaa ku sheegtay bartaheeda Instagram in mid ka mid ah suxufiyiintooda lagu dilay weerarka. Sidoo kale, waxay sheegtay in ugu yaraan saddex suxufi oo kale ay dhinteen.
Dhinaca kale, wakaaladda wararka ee Associated Press ayaa sheegtay in suxufi muuqaal-qaade ah oo u shaqayn jiray si madax-bannaan ay geeriyootay.
Ciidanka difaaca Israa’iil (IDF) ayaa sheegay in baaritaan horudhac ah la bilaabi doono kadib weerarka, waxaana ay ku andacooday in aysan si gaar ah bartilmaameedsan suxufiyiinta.
