Warar laga helayo magaalada Galkayo ayaa sheegaya in ugu yaraan labo askari ay ku dhinteen is-rasaaseyn ka dhacday gudaha magaalada, taas oo dhexmartay ciidamo ka kala tirsan Booliska iyo Daraawiishta maamulka Puntland.
Sida ay sheegayaan ilo kala duwan, ciidamo Boolis ah oo laga soo diray Garowe ayaa la sheegay in ay daba socdeen askar ka tirsan Daraawiishta oo lagu eedeeyay in ay qoryo la goosteen. Intaasi kadib, ciidamadaasi ayaa la kulmay cutub kale oo ka tirsan Daraawiishta, taas oo keentay is-faham la’aan degdeg ah iyo rasaas ay is dhaafsadeen labada dhinac.
Is-rasaaseyntan ayaa sababtay dhimashada ugu yaraan labo askari oo ka kala tirsanaa labada dhinac, inkastoo aan wali la xaqiijin tirada rasmiga ah ee khasaaraha.
Ilaa iyo hadda, laamaha ammaanka ee Puntland kama aysan hadlin dhacdadan, mana jirto faahfaahin rasmi ah oo laga bixiyay sababta dhabta ah ee keentay iska horimaadka.
Dhacdadan ayaa imaaneysa xilli magaalada Galkayo ay muddooyinkii dambe ka dhacayeen falal amni darro, oo ay ka mid yihiin dilal loo geysanayay askarta dowladda, taas oo walaac ku abuurtay shacabka ku nool halkaasi
