Dowladda Bariga Liibiya ayaa ku dhawaaqday inay mamnuucday gelitaanka muwaadiniinta afar dal oo Afrikaan ah, kuwaas oo kala ah Soomaaliya, Itoobiya, Eritrea iyo Suudaan.
Mas’uul ka tirsan dowladda ayaa sheegay in tallaabadan ay qeyb ka tahay dib-u-habeyn lagu sameynayo nidaamka gelitaanka ajaaniibta ee dalka.
Wareegto ay soo saartay dowladda fadhigeedu yahay magaalada Benghazi ayaa lagu sheegay in muwaadiniinta afartaas dal laga joojiyay inay Liibiya ka soo galaan dhammaan marinada dhulka, badda iyo hawada.
Dowladda Benghazi ee uu hoggaamiyo Osama Hamad ayaa taageero ka hesha taliyaha ciidamada Bariga Liibiya, Khalifa Haftar, oo gacanta ku haya bariga dalka iyo qaybo badan oo ka tirsan koonfurta Liibiya.
Dhanka kale, dowladda caalamku aqoonsan yahay ee uu hoggaamiyo Cabdi Xamiid Dbeibah ayaa xarunteedu tahay magaalada Tripoli.
Mas’uul ka tirsan maamulka Bariga Liibiya ayaa wakaaladda Reuters u sheegay in go’aankan looga gol leeyahay dib-u-habeyn lagu sameeyo habka ay ajaaniibtu ku soo galaan dalka.
Go’aanka cusub ayaa ka reebaya xubnaha safaaradaha iyo qunsuliyadaha la aqoonsan yahay iyo qoysaskooda.
Sidoo kale waxaa laga dhaafay shaqaalaha ka shaqeeya waxbarashada, caafimaadka iyo adeegyada la xiriira, haddii ay haystaan oggolaanshaha lagama maarmaanka ah iyo heshiisyo shaqo oo sharci ah.
Liibiya ayaa tan iyo markii la riday hoggaamiyihii hore ee dalka, Muammar Gaddafi sanadkii 2011, noqotay marin muhiim ah oo ay isticmaalaan muhaajiriinta ka cararaya colaadaha iyo saboolnimada si ay ugu gudbaan Yurub.
Dalka ayaa sidoo kale wajahayay khilaafyo siyaasadeed iyo kuwo amni tan iyo sanadkii 2014.
Sida ay muujinayaan xogaha Qaramada Midoobay, Liibiya waxaa ku sugan in ka badan 900,000 oo muhaajiriin ah, kuwaas oo intooda badan ka yimid dalalka Afrika.
