Dowladda Federaalka Soomaaliya ayaa la sheegay inay dardar gelinayso qorshaha ay ku doonayso inay doorashooyin ka qabato dowlad-goboleedka Galmudug, kaddib is-afgarad siyaasadeed oo la sheegay inuu dhexmaray Madaxweynaha Galmudug, Axmed Cabdi Kaariye (Qoorqoor), iyo madaxda Villa Soomaaliya.
Wararka la helayo ayaa tilmaamaya in Dowladda Federaalka ay taageerayso Ganacsade Liibaan Axmed inuu noqdo musharraxa xisbiga JSP ee Galmudug, iyadoo qorshahan uu qayb ka yahay diyaarinta doorashooyinka la qorsheynayo.
Ra’iisul Wasaaraha Soomaaliya, Xamse Cabdi Barre, ayaa la filayaa inuu berri gaaro magaalada Dhuusamareeb si uu u sii ambaqaado wada-hadallada iyo is-afgaradka la xiriira arrimaha doorashooyinka Galmudug.
Dhanka kale, mucaaradka ayaa ku eedeeyay Dowladda Federaalka inay waddo hannaan doorasho oo horay loogu sii diyaarinayo hoggaamiyeyaasha la dooranayo, iyagoo ku tilmaamay nidaamkaasi mid aan si dhab ah uga turjumayn doorasho xor ah.
Sida qorshaha Dowladda Federaalka uu yahay, doorashooyin ayaa hore looga qabtay Koonfur Galbeed, halka Galmudug ay noqonayso maamulka xiga.
Waxaa sidoo kale la qorsheynayaa in doorashooyin laga qabto Hirshabeelle, deegaannada Waqooyi Bari ee heer deegaan, iyo gobolka Gedo ee Jubbaland.
Mucaaradka ayaa ku baaqaya in la joojiyo nidaamka hadda socda, isla markaana dalka loo jiheeyo doorashooyin toos ah oo aan ku dhisnayn nidaamka xisbiyada, balse ku saleysan heshiis siyaasadeed oo loo dhan yahay.
