Iiraan ayaa gantaallo ku weerartay saldhigyada uu Mareykanka ku leeyahay dalalka Qatar & Ciraaq.
Ciidanka Ilaalada Kacaanka Iiraan , ayaa ku dhawaaqay inay si toos ah u beegsadeen saldhigga milatari ee Mareykanka ku leeyahay Qatar ee Al Udeid, halkaasoo ay sheegeen inay la beegsadeen gantaallo wax burburiya.
Wakaaladda wararka Iiraan ee Tasnim, ayaa xaqiijisay inay Iiraan si rasmi ah u weerartay saldhigga uu Mareykanka ku leeyahay dalka Qatar.
CNN, ayaa ku warramaysa inay ciidanka Mareykanka la tacaalayaan weerarro gantaallo iyo diyaaradaha aan duuliyaha lahayn oo ay Iiraan ku qaaday saldhigyada Mareykanka ee Ciraaq iyo Qatar.
Muuqaalo lagu baahiyey baraha bulshada ayaa laga soo bandhigay gantaalo duulaya hawada magaalada Dooxa ee xarunta dalka Qatar, kaddib weerar gantaallo ah oo Iiraan ku qaaday saldhigga Mareykanka ee ku yaal Qatar.
Qaraxyo ayaa laga maqlaya magaalada Doha ee xarunta Qatar , iyadoo dab weyn laga arkayo hawada Doha , waxay u muuqata in la howlgaliyay nidaamyada difaaca saldhigyada Mareykanka ee ku yaal Qatar, sida ay werisay Al Jazeera.
Golaha amniga qaranka Iiraan ayaa warsaxaafadeed ka soo baxay, waxay ku sheegeen :”Weerarka aan ku beegsanay saldhigga Al Udeid wuxuu la xiriiraa ciidamada Mareykanka, mana aha mid khatar gelinaya walaalaheen Qatar.”
Wargeyska New York Times, ayaa ku warramay inay Iiraan , ku wargelisay Qatar — weerarka ay ku qaaday saldhigga Mareykanka ee Qatar.
Dalka Imaaraadka Carabta , wuxuu xiray hawadiisa, iyadoo dhawaqa ka diga weerarrada laga shiday dalka Bahrain, kaddib markii Iiraan ay qaaday weerarro ka dhan ah saldhigyada Mareykanka uu ku leeyahay dalalka Carabta.
LA SOCO WIXII SO KORDHA..
