Wasaaradda Warfaafinta, Xukuumadda Federaalka Soomaaliya ayaa warsaxaafadeed rasmi ah kasoo saartay qaraxii saaka ka dhacay afaafka hore ee xerada ciidanka Damaanyo ee degmada Hodan, magaalada Muqdisho.
Qoraalka kasoo baxay wasaaradda ayaa lagu sheegay in qaraxa uu ahaa mid ismiidaamin ah oo uu fuliyay qof naftiisa haligay, balse ciidanka ilaalada xerada ay ka hortageen in falkaasi sababo khasaare baaxad leh. Qaraxa ayaa dhacay saacaddu markay ahayd abaare 09:20am, xilli dad shacab ah oo isugu jiray dhalinyaro doonaysay inay ku biiraan ciidanka ay ku sugnaayeen agagaarka xerada.
Wasaaradda Warfaafinta ayaa intaa ku dartay in hay’adaha amniga ay wali wadaan baaritaanno iyo xaqiijin rasmi ah oo ku saabsan khasaaraha ka dhashay qaraxa, iyadoo shacabka Soomaaliyeed loogu baaqay in ay sugaan wararka rasmiga ah ee kasoo baxa laamaha amniga.
“Ciidanku waxa ay ka hortageen in dhagar qabuhu gaaro yoolkiisa ahaa in uu khasaaro xooggan gaarsiiyo shacabka,” ayaa lagu yiri warsaxaafadeedka.
Wasaaraddu waxay sidoo kale sheegtay in faahfaahin dheeraad ah oo dhameystiran laga soo saari doono qaraxa goor dhow.
Qaraxan ayaa imanaya xilli ay korodhay feejignaanta amni ee caasimadda, waxaana wali socda baaritaanno lagu ogaanayo cidda ka dambeysay qaraxa.
