Dowladda Federaalka Soomaaliya ayaa diyaarisay ciidamadii ugu badnaa oo loo qorsheeyay inay ka qeyb qaataan howlgallo ballaaran oo lagu doonayo in Al-Shabaab looga saaro deegaannada ay wali kaga sugan yihiin gobolka Shabeellaha Dhexe, gaar ahaan degmada istiraatiijiga ah ee Aadan Yabaal.
Ciidankan oo lagu soo bandhigay deegaanka Garasweyne ayaa lagu sifeeyay kuwa si gaar ah loo tababaray, kuna qalabeysan agab casri ah oo loogu talagalay in lagu fuliyo hawlgallo culus oo la xiriira sugidda amniga iyo dib u soo celinta maamulka dowladda ee degmooyinka muhiimka ah.
Saraakiisha hoggaamineysa howlgalkaan ayaa sheegay in abaabulkaan uu yahay mid qayb ka ah wejiga labaad ee dagaalka ka dhanka ah kooxda Al-Shabaab, kaasi oo looga gol leeyahay in laga xoreeyo dhammaan deegaannada ay wali kaga sugan yihiin gobollada bartamaha dalka.
Howlgalka ayaa lagu wadaa in uu bilaabmo maalmaha soo socda, waxaana lagu saleeyay qorshe la isku dhafay oo ay qayb ka yihiin ciidamada xoogga dalka, kuwa Booliiska iyo xoogagga deegaanka.
Degmada Aadan Yabaal ayaa waxaa xiligan gacanta ku haya maleeshiyaadka Al-shabaab.
