War qoraal ah oo ka soo baxay dowladda Soomaaliya ayaa lagu sheegay in Mareykanka ay duqeyn ka fuliyeen deegaano ka tirsan Gobolka Jubbada Hoose.
Qoraalka ayaa lagu sheegay in Iyadoo la kaashanayo Dowladda Federaalka Soomaaliya, Taliska Ciidamada Mareykanka ee Afrika (AFRICOM) ay duqeyn dhanka cirka ah laga fuliyay meel qiyaastii 40 meel waqooyi-galbeed kaga beegan magaalada Kismaayo, oo halkaasi ay ku sugnaayeen maleeshiyaadka Al-Shabaab.
“Duqeyntan ayaa qeyb ka ah dadaallada wadajirka ah ee lagu ciribtirayo awoodda maleeshiyaadka Khawaarijta ah ee Al-Shabaab ee qorsheynta iyo fulinta weeraro argagixiso oo khatar ku ah shacabka Soomaaliyeed, ciidamada qalabka sida iyo saaxiibada caalamiga ah.” ayaa lagu yiri qoraalka.
Dowladda Soomaaliya qoraalkeeda kuma sheegin khasaaraha ka dhashay duqeynta iyo haddii la beegsaday saraakiil iyo dagaalamayaal ka tirsan Al-shabaab.
Sidoo kale qoraalka ayaa waxaa intaasu lagu daray”Dowladda Federaalka Soomaaliya waxay u mahad celinaysaa howlgalka AFRICOM, waxayna mar kale adkaynaysaa sida ay uga go’an tahay la dagaallanka kooxaha Khawaarijta ah, iyadoo kaashaneysa shacabka Soomaaliyeed iyo saaxiibada caalamiga ah, si loo xaqiijiyo nabadgelyada iyo xasilloonida dalka.”
