Dowladda Federaalka Soomaaliya ayaa si adag u cambaareysay doorashada maanta ka dhacday magaalada Baydhabo, taas oo lagu doortay hoggaan cusub oo maamulka Koonfur Galbeed ah.
War-saxaafadeed ka soo baxay Wasaaradda Arrimaha Gudaha ayaa lagu sheegay in doorashadaasi ay ahayd mid “sharci-darro ah” isla markaana hore loo sii qorsheeyay, islamarkaana ay ka hor imaanayso heshiisyadii Golaha Wadatashiga Qaranka, xeerarka doorashooyinka iyo dastuurka dalka.
Dowladda ayaa tilmaantay in habka doorashada loo maray uusan ahayn mid hufan ama xor ah, iyadoo xustay in geeddi-socodka lagu soo afjaray muddo 24 saacadood gudahood ah, taas oo aan waafaqsanayn nidaamka dimuqraadiyadeed.
Sidoo kale, dowladda ayaa sheegtay in tallaabadan ay sii xoojinayso tabashooyinka ka jira Koonfur Galbeed isla markaana ay dhaawaceyso dadaallada dib-u-heshiisiinta iyo dowlad-dhiska.
“Ma aqbali karno hannaan kasta oo sharci-darro, qasab iyo musuq siyaasadeed ku saleysan oo lagu daboolay magac doorasho,” ayaa lagu yiri war-saxaafadeedka.
Dowladda Federaalka Soomaaliya ayaa mar kale ku celisay sida ay uga go’an tahay ilaalinta dastuurka, nidaamka federaalka, iyo hirgelinta doorashooyin xor, xalaal ah oo ka tarjumaya rabitaanka shacabka Soomaaliyeed
