Duqeyn dhanka cirka ah ayaa xalay laga fuliyey deegaanka Naaxiyow, oo hoostaga Dolondoola, halkaas oo lagu beegsaday saldhig muhiim ah oo ay kooxda Al-Shabaab ku lahaayeen deegaankaasi.
Sida ay sheegayaan ilo dhinaca amniga ah, goobta la duqeeyey ayaa la sheegay inay ahayd xarun ay kooxda Al-Shabaab u adeegsanaysay abaabulka iyo diyaarinta weerarro ka dhan ah fariisimaha Ciidanka Xoogga Dalka Soomaaliyeed (XDS) ee ku yaalla duleedka magaalada Baydhabo.
Ilo amni ayaa sheegay in intii uu socday howlgalka cirka lagu burburiyey gaari dagaal oo ay kooxda lahayd, iyadoo sidoo kale la soo wariyey in duqeynta lagu gaarsiiyey Al-Shabaab khasaare xooggan oo dhimasho iyo dhaawacba leh.
Faahfaahin rasmi ah oo ku saabsan tirada khasaaraha iyo cidda fulisay duqeynta ayaan weli si rasmi ah loo shaacin, hase yeeshee ilo amni ayaa sheegay inay dhowaan soo bixi doonaan faahfaahino dheeraad ah oo ku saabsan natiijada howlgalka.
Howlgalkan ayaa kusoo beegmaya xilli ciidamada dowladda ay xoojinayaan howlgallada ka dhanka ah Al-Shabaab iyo ilaalinta fariisimaha ciidamada ee duleedka Baydhabo.
